El mercadín Solidariu
(lo llamen mercadín y nun lo ye…)

Ocúrresenos axuntar lo lúdico colo social, ocúrresenos contribuir de dalguna manera a frayar l’aisllamientu que tovía nos atenaza en grandes zones de la nuesa vida, ocúrresenos que del contactu naz el roce y del roce la solidaridá… ocúrresenos que los espacios d’alcuentru son idóneos pa que circule la información, circulen les afinidaes, circulen los proyectos y cuayen les idees de les que salen les acciones.

 

Eses ocurrencies son les que nos lleven a planteavos el mercadín solidariu, que como añade’l soniquete: lo llamen mercadín y nun lo ye… y, nun lo ye, porque de la so esencia pretendemos erradicar too aquello que de cerca o de lloñe suene a mercadería, mercaderes o mercancía, por embargu sedría d’inxenuos creer que sometíos/es a la dictadura del dineru y a la so represión, fuéremos quien a articular una forma de solidaridá de la que esi venenu nun fuere parte de la ecuación. Pa solventar el dilema queremos aplicar (ensin que sirva de precedente) el métodu homeopáticu: el venenu en pequeñes dosis puede contribuir a curar.

Los sábados  a partir de les 12h tendrá llugar nel Centru Social Sestaferia (c/Joaquin Alonso Bonet nº3 Xixón) el mercadín solidariu cola so:

-Zona de gratuidá: ropa y otros complementos

-Zona d’intercambiu: información, axenda social, actividaes, (aquellos/es interesaos/es pueden apurrir los sos materiales pa difundir, publicaciones, panfletos, material dixitalizáu, documentales…) posibilidá de güecu pa esponer los documentos y publicaciones.

-Zona mercadín: llibros y varios… (coste: siempre la voluntá)

-Zona lúdica: pinchos solidarios

-Zona Ubuntu: un miembru de los colectivos Softastur Ubuntu Ast tará presente pa resolver les duldes que tengáis sobre esti sistema operativu de software llibre.

Lo recaudao sedrá destinao a partes iguales (50%/ 50%) pa una causa solidaria personalizada y una caxa de resistencia concreta (rotativo).

LLUCHA Y SOLIDARIDÁ

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>