Esti miércoles 20 de xunu va celebrase un xuiciu de faltes n’Uviéu. Nél vamos ser xulgaes dos persones por una falta “ensin especificar” arriendes d’unes identificaciones. Consideramos necesariu denunciar esta situación y esplicar la nuesa posición ante lo que pensamos ye una persecución pola nuesa actividá en movimientos sociales.

Lo primero que queremos esclariar ye qu’esti casu nun ye un fechu aislláu, nun ye’l primeru nin de xuru va ser el postreru; identificaciones como esta son una constante pa les persones actives políticamente. Nun mos presta’l rollu de “víctimes”, paezmos que la represión ye consecuencia de la nuesa participación nes lluches politiques. Lo qu’atalantamos ye cómo encariar y denunciar esta represión. Tenemos claro que na situación actual la represión crez pa estremar a la xente, esparder el miéu y de resultes fomentar la pasividá. Ye un frenu a una actividá que yá esiste, ta surdiendo o puede surdir, un frenu a la rebelión que sería la respuesta más lóxica ante la situación na que vivimos. Los retayos nun esisten namás nel ámbitu económicu sinón que s’estienden a les nueses llibertaes y derechos. Tamos siendo testigos de nueves lleis empobinaes a torgar cualquier tipu de manifestación contra l’orde establecíu, cuando la posibilidá d’un españíu social ye cada vez más nidia. Munches vegaes la táctica usada ye “afogamos” con multes; esta represión indirecta ye efectiva a munchos niveles. Ye una manera, nel meyor de los casos, de quitar tiempu pa trabayar nes lluches, al tener que dedicamos a estos xuicios “farsa”. Pensamos que ye necesaria, una vegada más, cavilgar la nuesa respuesta frente a esta estratexa d’apretamos económicamente.

Nun dexamos de ser persones privilexaes tamién frente a la represión, sabemos qu’hai xente que-mos sofita, nun tamos lloñe del nuesu llar y les nueses families; poro, ye más fácil pa nos denunciar l’acosu de los cuerpos de seguridá. Nun escaecemos qu’esos mesmos cuerpos represivos ensáñense con colectivos que pola so condición son muncho más vulnerables frente a la violencia policial (persones recluyíes en centros de menores, inmigrantes, prostitutes, etc.), yá que furrulen baxo’l poder que da la invisibilidá ya impunidá, llegando esta persecución a palices diaries nel casu de menores marroquinos. Tampoco escaezamos que los cuerpos de seguridá nun son otro qu’una ferramienta nes manes de los nuesos braeros enemigos (políticos, banqueros, grandes empresarios, etc.).

Llanzamos una propuesta pa torgar l’aislamientu, coordinamos na cai y tamién frente a la represión, tar sollertes a toos esos casos que-mos intenten amatagar y crear raigaños fuertes de solidaridá ente la xente.

Convocámosvos el miércoles 20 de xunu de 2012 a les 10 de la mañana nos Xulgaos de Llamaquique n’Uviéu (Cai Comandante Caballero).

Nun van callamos

La llucha ye l’únicu camín

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>